Antwort an die Maibaumdiebe

 

 

Ihr habts den oidn Maibam gstohln,

habts glaubt, wir sollt'n dafür zoin.

Doch des hamma bewusst net gmacht,

sonst hättens uns bestimmt ausglacht.

 

Des Maibamstehlen kenn ma auch,

des is bei uns in Bayern Brauch.

Doch sollte man den NEUEN stehlen,

für'n oid'n sollt der Anreiz fehlen.

 

Denn der is wirklich ned vui wert,

weil er ja nur no eighoatzt g'hert.

Den habts ihr eich von uns "ausborgt",

damit er glei scho is "entsorgt".

 

Wir kenn ma eich ja guat versteh,

vom Golddorf is a der Oide sche.

Drum habts eich diesen Baum geschnappt,

a wenn der war scho zwoamal kappt.

 

Dafür habts eich a bisserl gschundn

und so an neia Brauch erfundn.

Der alte Bam kam eich net deier

und brennt viel besser als a neier.

 

Des "Überraschungsmail" war wirklich guat,

drum ziang ma jetzt vor eich den Huat

und ladn  eich gern zu uns her ei,

beim Fischerfest solls dann wohl sei.

 

Ende Julei find des jed's Jahr statt,

de Gschicht dann a  a Ende hat.

Wir dat ma eich dann gern begrüßen

und so mitnand den Deal begießen.

 

Wir Haingkofrer san auch recht lieb,

so nehma zruck die "dümmsten" Dieb'.

A Gaudi wars auf jeden Fall,

drum grüßen aus dem Labertal

 

Die "bestohlenen" Golddörfler aus Haidenkofen

 

Beitrag vom 19.05.2010